Гэрээсээ ч ажилласан оффис дээрээ ч бай их ажлын дундуур бид завсарлага авч сэтгэлээ сэргээх зүйл шаарддаг билээ. Кофе уугаад л болчихдоггүй үе бас бий. Тийм үед гаднаасаа тэр тусмаа гоо зүйн талаасаа сэтгэлээ сэргээх нь илүү үр дүнтэй байдгийг та мэдэх үү? Зөөлөн үнэртэн эсвэл уруулаа чийгшүүлэхэд л цаанаасаа гэрэлтээд ирдэг нь сэргэг мэдрэмжийг өгдөг шүү. Сторагийн уншигчдадаа бага ч болов тус нэмэртэй байх болов уу гэх үүднээс ээлжит нийтлэлээ хүргэж байна.

Бид бүтэн өдрийн турш дэлгэц ширтэн эсвэл оффисын битүү орчинд өдөржин сууж ажилласнаас болоод арьс өнгө зүсээ алдан гундуу харагддаг шүү дээ. Энэ нь маргаангүй хүн бүрд тулгардаг нийтлэг асуудал бөгөөд уг асуудлыг шийдэхэд бидэнд арьсыг чийгшүүлэгч мист байхад л болох юм.

Too Faced Hangover Rx 3 in 1 Setting Spray нь арьс болон нүүр будалтад маш сайн тохирдог. Харин илүү хөнгөн бүтэцтэйг хайж байвал Avène Thermal Spring Water нь рашааны уснаас гаргаж авдаг бөгөөд эрэгтэй, эмэгтэй тэр бүү хэл багачууд ч хэрэглэхэд тохиромжтой төгс сонголт юм. 

Бүсгүйчүүд бидний хамгийн том дайсан бол үдээс хойших үеийн Т-zone хэсгийн тослог байдал гэхэд маргахгүй байх. Үүнийг шийдсэн төгс бүтээгдэхүүнийг админ нь олсон байгаа. 

MAKE UP FOR EVER Ultra HD нунтаг энгэсэг нь духны гялалзсан байдлыг зохицуулах төгс бүтээгдэхүүн юм. Энэхүү өндөр нягтралтай нунтгийг хөнгөхөн түрхэхэд л бүсгүй таныг уулзалт, хурлын үеэр санаа зовоолгүйгээр дур булаам харагдуулах болно. Уг бүтээгдэхүүний онцлог нь HD камеруудад зориулагдсан тул духны T-zone тослогдоно гэдэг зүйлийг мартаарай. Бүсгүй та олон бүтээгдэхүүн түрхэх шаардлагагүйгээр Т-zone хэсгийг энэхүү нунтаг энгэсгээр хөнгөхөн дарахад л хангалттай.

Эрүүл ахуй энгийн зүйлээс эхэлдгийг бид бүгд сайн мэднэ. Гараа хүйтэн бүлээн усаар угаах төдийд цэвэр цэмцгэр оршихуйг мэдрэхээс гадна нойр хүртэл сэргээд ирдэг шүү дээ. Гэхдээ заримдаа суудлаасаа ч өндийх завгүй ажилтай үед сэнгэнэсэн үнэртэй гар ариутгагч, гарын тос байхад мөн адил мэдрэмжийг өгдөг билээ. Хэрвээ та олон бүтээгдэхүүн хольж түрхэх дургүй бол найрлагадаа сэнгэнэсэн гааны үнэртэй бактерийн эсрэг гар ариутгагч, кокос, аль эсвэл шиа тос агуулсан гар арчилгааны бүтээгдэхүүнийг зөвлөж байна. 

Өглөө гэрээсээ гарахдаа сүрчгээ түрхэхээ мартаад гарах тэр мөчид тухайн өдөр бүхэлдээ онцгүй мэт санагддаггүй гэж үү. Админ нь өөрөө үнэртэн д их дуртай болохоороо ч тэр үү цүнхэндээ зайлшгүй 1 сүрчигтэй явдаг юм. Тэр нь ч бас их давуу талтай байдаг шүү. Гэнэтийн уулзалт, баасан гарагийн орой найзуудаараа уулзах болохоор заавал нэг өөрийн гэсэн сэргэх зүйл шаардлагатай болдог. Миний хувьд Hermes Un Jardin Sur Le Nil – ээ түрхээд л сэргэсэн мэдрэмж авдаг. Уг үнэртэн нь зөөлөн, сэнгэнэсэн үнэртэй ба яг эд цэцэг навч дэлгэрч буй үеийг илэрхийлж байгаа мэт.

Урин дулаан цаг ирж сэтгэл гэгэлзээд улам сайхан харагдах хүсэл төрдөг ч хаврын салхи, шороо, хуурай уур амьсгал гээд арьсаа арчлах гоо сайхандаа илүү анхаарах шаардлага дагаад гардаг. Өдрийн туршид уулзалт ярилцлагын үеэр таны уруул хатаж өнгөө алдсан мэт харагддаггүй гэж үү? Гоо зүй, эрүүл ахуйн талаасаа ч тэр уруулын арьс их хагарах тусам үрэвсэл бий болдог. Тиймээс уруулыг чийгшүүлэн арчлах нь зөвхөн эмэгтэйчүүдийн хийх зүйл биш бөгөөд эрчүүд ч гэсэн үүнийг анхаарах хэрэгтэй байх нь ээ. 

Laneige-ийн уруулын маск нь хамгийн сайн чийгшил өгдөг гэдгийг охид бүсгүйчүүд маань сайн мэдэх байх. Хэрвээ та хэтэвчид хэмнэлттэй төрлийг хайж байвал Burt’s Bees Overnight Treatment-д анхаарлаа хандуулаарай. Уг бүтээгдэхүүн нь боломжийн үнэтэйгээс гадна цэвэр байгалийнх гэдгээрээ алдартай юм.

Өглөө үсээ угаагаад гарсан ч салхи шороотой өдрүүд дээрээс нь агаарын бохирдол гээд гаднын нөлөөллөөс үүдээд бидний үс өдрийн хагас гэхэд л тослогдоод ирдэг. Бидний дунд үсний хуурай шампунь хэрэглээ тийм ч түгээмэл биш, гадуур дэлгүүрүүдээр ч тэр бүрчлэн харагддаггүй. Яарсан, цаг давчуу үед хуурай шампунь үнэхээр аминд ордог бүтээгдэхүүний нэг юм. Тиймээс ажлын өрөөндөө эсвэл цүнхэндээ хуурай шампунь байлгаж байхад буруудахгүй гэдэгт итгэлтэй байна.