Оффисын ажилтай болон сууж ажилладаг хүмүүсийн хувьд бүтээмжээ өндөрт барих, эрүүл мэнд талдаа анхаарах нь чухал зүйл болоод буй. Ачаалал ихтэй өдөр та хоолоо идэлгүй сууж байсан л байх, завсарлага авалгүйгээр суун ажиллах нь их ажил амжуулж буй мэт боловч яг үнэндээ ажлын чанар болон сэтгэлзүй, эрүүл мэнд талд сөргөөр нөлөөлөх нь их.

Сиеттл хотод байх Манлайлал хөгжлийн төв болох Фиерс-н Эдвард Ж.Белтран "Бид бие махбодоо сонсох нь маш чухал" гэж хэлсэн бөгөөд сууж ажилладаг хүмүүс хөнгөн зүйлс идэнгээ, агаар амьсгалж, оюун ухаанаа цэвэрлэхэд хэдэн минут зарцуулж байх нь асар чухал гэж зөвлөсөн байдаг.

Гэхдээ хөнгөн зүйл гээд energy bar идэх нь хангалтгүй ба завсарлага авсан л бол ажлаа бодолгүй амарч буй богино хугацаандаа бүрэн төвлөрөх ёстойг бас дурджээ.

Үргэлж өөрийгөө завгүй байлгаж, эрч хүчээр цэнэглэх гэж хүчлэх нь урт хугацаандаа бидний бие болон сэтгэлзүйд олон сөрөг нөлөө үзүүлэх боломжтой тул амрах богинохон хугацааг өдөр тутам өөртөө заавал гаргах нь чухал байх нь.

Тэгвэл хэрхэн бүтээмжээ өндөрт барьж, ажлын гүйцэтгэлээ нэмэгдүүлэн давхар амралтаа ч зохицуулах талаар бяцхан зөвлөгөөг танд хүргэе.

Та бичих дуртай бол үзэг цаас барин төлөвлөлт хяналт хийх, ухаалаг төхөөрөмж дээр илүү ажиллах дуртай бол төлөвлөлтийн өөрт тохирох аппликейшн татахаас эхлэх нь. Toggl Track болон RescueTime аппликейшн төлөвлөлт болон амралтын хугацаагаа хянахад тохиромжтой платформ гэдгийг дурдах зүйтэй болов уу. 

Өдрийг аль цагт илүү эрч хүчтэй байгаагаа анзаар. Та өглөөний хүн үү, илүү оройн цагаар бүтээмж өндөр байна уу гэдгээ мэдэж түүндээ таруулан чухал ажлуудаа тохируулах нь үр бүтээмжийг өндөрт барьдаг. Долоо хоногийн эхэнд тухайн өдрүүдийн ажлаа төлөвлөх нь хамгийн зохимжтой. 

Завсарлага авах цаг зөв байх, таны бүтээмжтэй цагтай уялдах нь алсдаа таныг стресст өртөхөөс сэргийлдэг. Зогсолтгүй ажиллаж байгаад нэг сайн амрахаас илүү богино завсарлагуудад хуваан амрах нь үр дүнтэй бөгөөд сэргэсэн мэдрэмж өгдөг гэдгийг батлах судалгаанууд ч бий. Амралт болон ажиллах цагаа зөв хуваарилан үр бүтээмжтэй ажиллахын тулд та завсарлага авах цагаа Google calendar, google workspace, microsoft outlook өөрийн ашигладаг төхөөрөмж дээрээ оруулан хөтлөөд үзээрэй. Ингэж дадал болгосноор уулзалтын цагийг хүртэл 5-10 минутаар богиносгодог байна шүү.

Амрах цагаа сэрүүлэг тавьж өөртөө сануулаарай. Ингэхдээ энгийн утасны сэрүүлэг бус дуут сануулга бүхий сэрүүлэг ашиглавал илүү гоё. Та завсарлага авахдаа Google assistant ашиглаж болох бол өдрийн төгсгөлд Google Home speaker-ээр Pete Seeger-ийн ‘Solidarity Forever’ дууг тоглуулж ажлаас тарах цаг болсныг мэдэгддэг бол бүр сонирхолтой гээд бод доо.

Дээрх дадлыг та өөртөө суулгахыг хүсвэл Amazon Echo Show 8 (3rd Gen) болон Google Nest Hub Max ухаалаг үйлдэлтэй төхөөрөмжүүдээс сонгож болох юм. Харин аналоги төхөөрөмж сонирхож байвал Time Timer-ийн ширээний цагийг сонирхоорой. Уг цаг нь 60 минут хүртэлх тохиргоотой бөгөөд цагаа зөв зарцуулахад тань тусалдаг шүү.

Ажлын бус цагаар имэйл болон аппликейшны мэдэгдлүүдийг хүлээн авахыг зогсоож, цагаа ажлын цагаар тааруулах нь таныг бүрэн амрахад нэмэртэй. Outlook, Google calendar-ууд дээр уулзалтын цаг, бусад хуваариа оруулж хэвших нь танд цагаа зохицуулах болон бусдад өөрийн цагийг харуулан мэдэгдэхэд хамгийн тохиромжтой хэрэгсэл юм. 

Өөрийн ажиллаж буй статусаа /хуралтай байна, уулзалттай, төвлөрөн ажиллаж байна гм/ календарьтайгаа холбох нь бусад хүн таныг тухайн цагт юу дээр төвлөрч буйг мэдэх боломж олгодог тул таныг залхаахгүй сул цагаар тань холбогдох боломж олгодог.

Ажлын дундуур, цайны цагаар дуг хийх огтоос санаа зовох зүйл биш бөгөөд харин ч хэвшүүлж чадвал танд хамгийн хэрэгцээтэй амралт болдог. Чухал ажлаа үр бүтээмжтэй ажилладаг үедээ хуваарилаад хэсэгхэн зуур ч болов унтах гээд үзээрэй. Дийлэнх хүмүүст  20-30 минут унтаж амарсны дараа илүү сэргэг мэдрэмж төрдөг байна. Өдрийн дундуур унтах нь хүний сэтгэл санааг дээшлүүлэхээс гадна, ой санамжийг сайжруулж, анхаарал төвлөрөхөд эергээр нөлөөлдөг тул та ажлын өрөөндөө bean bag тавиад, нүдний хаалтын хамт цайны цагийн 20 минутыг унтаж амрахад зарцуулах гээд үзээрэй. Мөн дуу тусгаарлагчтай чихэвч аваад ажлын ачааллаасаа түр ч болов холдож болох юм.