Хамгийн үнэ цэнтэй мэдлэг, чадварыг бэлэглэдэг туршлага бол аялал гэдэгтэй хэн ч маргахгүй биз ээ. Хаана, ямар хугацаагаар, хэнтэй аялж байгаагаас үл хамааран үүргэвчээ үүрээд гэрээсээ гарсан хүн бүр шинэ мэдлэг, туршлагыг өвөртлөн буцаж ирдэг. Тийм ч учраас зөв цагийг хүлээлгүй яг одоо газар үзэж, нүд тайлах ёстойг туршлагатай аялагч нар үргэлж зөвлөдөг. 

Монгол улсаараа эсвэл гадаад орнуудаар аялж байгаагаас үл хамааран санаа зовнилгүй, тав тухтай бөгөөд адал явдалтай аялахад бэлтгэлээ сайн базаах хамгийн чухал. Бэлтгэлтэй аялахад мэдээж сайн хэрэгслүүд танд хэрэг болно. Сайн аяллын хэрэгслүүдэд хөрөнгө оруулах нь насан туршид тань хэрэглэгдэх аяллын сайн хань нөхдөө бүрдүүлж буйтай адил. Нэг удаа худалдаад авчихсан байхад урт хугацаандаа таны цаг, мөнгө, энергийг хэмнээд зогсохгүй аялал бүрд үргэлжид бэлтгэлтэй байх боломжийг олгодог.  

Тиймээс Стора нь энэхүү нийтлэлээрээ таны аялалд зайлшгүй хэрэг болно гэж үзсэн бүтээгдэхүүнүүдийг түүвэрлэн, тус бүрийн давуу болон сул талыг дэлгэрэнгүй тайлбарлан хүргэж байна. Нэг өдөр Эрдэнэт явах ч бай, сарын турш Европоор аялах ч бай, бүх нөхцөлд тань тохирох чухал бүтээгдэхүүнүүдийг багтаасан байгаа 💛

Сайн бэлтгэсэн үүргэвч гэдэг нь таны бодсоноос цомхон боловч хэрэгтэй бүх зүйлсийг тань агуулсан байхыг хэлнэ. Үүргэвчний хэмжээг Liters буюу литрийн хэмжигдэхүүнээр хэмждэг бөгөөд энэ нь өндөр, өргөн болон гүнзгийг үржүүлснээр гардаг. 45L хэмжээтэй цүнх нь багтаамж сайтай боловч дүүрэн үедээ нэлээд хүнд болчихдог талтай. Харин 35L хэмжээтэй цүнх нь харин дүүрсэн ч нээх хүндрээд байдаггүй тул богино аялалд болон өдөр тутамд тохиромжтой. 

Дунд зэргийн багтаамжтай бөгөөд үүрэхэд гайгүй авсаархан боловч багтаамж сайтай. Чемодан шиг бүтэн нээгддэг буюу тойрсон цахилгаан бүхий загвартай. Дотроо хэд хэдэн торон тасалгаатай учраас эд зүйлсээ цэгцтэй авч явахад тусална. Зарим загварууд нь бэлхүүсээр түгждэг давхар хамгаалалттай. Дөрвөн талдаа бариултай учраас ийш тийш зөөхөд тун эвтэйхэн. 

• Хэнд тохиромжтой вэ: Хэрвээ та гурваас дөрөв, зарим тохиолдолд долоо хоногоор аялалд явахаар зэхэж байгаа бол энэ үүргэвч хамгийн тохиромжтой. Их ачаа авч явах шаардлагатай нэг, хоёр өдрийн богино аялалд ч болно. Ерөнхийдөө чемодан шиг зөөвөрлөх, онгойлгох, эд зүйлсээ цэгцэлж хуваарилах зэрэг чухал онцлогуудыг өөртөө шингээсэн үүргэвч гэж ойлгож болох нь. 
• Давуу болон сул талууд: Үүргэвчний бүх тасалгааны zipper буюу цахилгаан нь хамгаалалтын гогцоонуудаар хамгаалагдсан учраас хэн нэгэн онгойлгоод хулгай хийнэ гэж санаа зовох шаардлагагүй. Урд хэсэг нь усны хамгааалалттай зузаан материалаар хийгдсэн. Зөөврийн компьютер болон таблет хийдэг тусгай хэсэг хүртэл бий. Харин нэг сул тал нь үзэг, дэвтэр, чихэвч зэрэг жижиг хэрэгслүүдээ цүнх дотроо гээж алга болгохгүйгээр цэгцтэй хийх газар ховор. 

North Face брэнд нь чанартай, удаан эдэлгээтэй хувцас хэрэглэл, гутал зэргийг үйлдвэрлэдгээрээ алдартай. Мэргэжлийн тамирчдаас авхуулаад сонирхлоороо уулан авирагч хүмүүс хүртэл өдөр тутмын хэрэглээгээрээ сонгодог шүү дээ. Өөрсдийн стандарт бүхий өндөр чанар, хийц, тав тухтай байдлаа үйлдвэрлэдэг бүх бүтээгдэхүүндээ шингээдгийг нь та уг үүргэвчнээс ч мэдрэх боломжтой. 

• Хэнд тохиромжтой вэ: Аялалд авч явж болохуйц хэр нь мөн өдөр тутамдаа ажил, сургуульдаа үүрэх боломжтой цүнх хайж буй хүмүүст хамгийн тохиромжтой. Мөн цөөн өдрөөр, цомхон ачаатай аялалд явж буй хүмүүст Стора нь энэ цүнхийг санал болгоно. Нуруунд наалдаж хөлөргөөд байхгүй бөгөөд давхар зөөлөвч нь үүрэхэд маш эвтэйхэн болгодог тул удаан хугацаагаар ууланд авирдаг хүмүүст мөн тохиромжтой.  
• Давуу болон сул талууд: Бидний эхний санал болгосон Allpa цүнхтэй харьцуулахад үнийн хувьд хямд. Мөн маш олон өнгөний сонголттой учраас өнгө, загвар нь таалагдахгүй байх вий гэж санаа зоволтгүй. Allpa цүнхэнд ойр зуурын жижиг эд зүйлсээ хийх газар байхгүй байсан бол North Face-ийн үүргэвчинд хэд хэдэн жижиг торон болон цахилгаантай тасалгаа бий. 

Бусад санал болгож буй үүргэвчнүүд: 

Хувцас хэрэглэлийн хувьд мэдээж очиж буй газар, үйл явдал болон цаг агаартаа зохицуулан бэлдэх нь зүйтэй. Тиймээс очиж буй газрынхаа цаг агаарыг судалж, түүндээ тохируулан бэлдээрэй. Гэхдээ та хаашаа аялж байгаагаас үл хамааран саравчтай малгай, борооны цув, сайн чанарын футболк зэрэг заавал таны үүргэвчид байх хэрэгтэйг санаарай.

Малгай

Малгайнаас илүү нарнаас сайн хамгаалагч хэрэгсэл гэж үгүй билээ. Яг одоо тренд болоод буй үйсэн мэт материалтай бүрх малгайг эмэгтэйчүүддээ зөвлөж байна. Саравчтай малгайны хувьд Adidas брэндийн малгай өдөр тутамд өмсөхөд тохиромжтой минимал загвартай атлаа удаан эдэлгээтэй санагддаг. 

Борооны цув 

Борооны цув нь нартайд нарнаас хамгаалж бороотойд борооноос хамгаалдаг учраас бүх төрлийн цаг агаарт авч явахад тохиромжтой байдаг. 

Үнийн хувьд боломжийн атлаа чанартай цув гэвэл Columbia брэндийн Arcadia цувыг санал болгож байна. Уг цув нь нимгэн материалтай, өмссөн ч өмсөөгүй мэт хөнгөн, уртын хувьд тохиромжтой бөгөөд малгайтай. Түүнчлэн 40 гаруй өнгөний сонголттой учраас дуртай өнгийн цуваа сонгоход асуудалгүй.

Харин илүү зузаан материалтай, чанартай цув хайж байгаа бол Helly-Hansen брэндийн цувнуудыг сонирхоорой. Эрэгтэй цув нь өнгө, загварын хувьд миний харсан хамгийн “cool” нь байсан шүү. 

Аялал бүрд заавал авч явах ёстой зүйлсийн нэг бол яахын аргагүй өдөр тутамд ашигладаг эрүүл ахуйн хэрэгслүүд билээ. Танд хэрэг болохуйц аяллын хэрэгслүүдийг доор жагсаалаа. 

Жижиг цүнх 

Бүх ариун цэврийн хэрэгслүүдээ нэг дор багтаах цүнх танд зайлшгүй хэрэг болно. Стора нь BAGSMART брэндийн өлгөдөг жижиг цүнхийг санал болгож байна. Үүргэвчиндээ хийгээд явахад авсаархан бөгөөд удаан эдэлгээтэй хэр нь дотроо маш их зүйлсийг багтаадаг. Мөн дээрээ өлгүүртэй тул шүршүүрийн хөшиг эсвэл алчуурын өлгүүрээс өлгөөд эд зүйлсээ хялбар аваад хэрэглэчхэж болно. Эд зүйлсээ босоогоор нь хийх боломжтой тул асгарахад санаа зоволтгүйн дээр усны хамгаалалтай нь хамгийн их таалагдсан. 

Аяллын жижиг савны сет 

Өдөр тутамд ашигладаг шампунь, ангижруулагч болон арьс арчилгааны хэрэгслүүдээ ашиглах хэмжээгээрээ жижиг сав руу шилжүүлэн хийчихвэл аяллын үед асгарна, цүнх хүндэрнэ гэж санаа зовох асуудалгүй болно. Олон төрлийн хэмжээний сонголттой, өөрийгөө цэвэрлэх хэрэгсэлтэй, бүгдийг нь цэгцтэй багтаах цүнхтэй дээрх бүтээгдэхүүнийг Стора нь санал болгож байна. 

Хэрэв та хол газар луу онгоцоор нисэж хүрэх гэж байгаа бол тухгүй сандалд хэдэн цагийн турш суух магадлал өндөр. Тиймээс илүү тухтай аялахад тань туслах хэрэгслүүд, жишээлбэл дэр, чихний бөглөөс, нүдний хаалт гэх мэт.

Хүзүүний дэр 

Онгоцонд хүзүүний дэргүйгээр удаан явна гэж төсөөлөхөд ч бэрх. Гэхдээ дэрээ сонгохдоо бас хэд хэдэн зүйлсийг харгалзаж үзэх шаардлагатай. Стора-аас нь санал болгож буй TravelRest хүзүүний дэрний ар тал нь хавтгай тул бусад дэрнүүд шиг хүзүүг суудлаас холдуулж арагшаа гилжийгээд байхгүй. Мөн унтаж байх үед халтирахаас сэргийлэх резинэн хэсгүүдтэй. Хилэн материал бүхий гадаргууг нь салгаад угаалгын машинд угааж болдог нь тун амар. 

Дуу тусгаарлагчтай чихэвч 

Бусад чихэвчтэй харьцуулахад Bose Headphones 700 бол хамгийн олон талт ажиллагаатай чихэвч. Дуу тусгаарлах тохиргоог нь 0-10 хүртэл тохируулах боломжтой учраас орчиндоо зохицуулан сонгох боломжтой нь хамгийн гоё. 20 цагийн турш ажиллах хүчин чадал бүхий баттерэй нь урт хугацааны турш үргэлжлэх онгоцны нислэгийг даван гарахад тань тусална.

Бусад чухал хэрэгслүүд