Apple компани зургаадугаар сарын 5-ны өдөр Apple-ийн Дэлхийн Хөгжүүлэгчдийн Бага Хурал буюу WWDC 2023 арга хэмжээгээр “Apple Vision Pro” буюу VR/AR төхөөрөмжөө танилцууллаа. 3,499 долларын үнээр худалдагдах уг төхөөрөмж нь 2024 онд худалдаанд гарна хэмээн Apple-ээс мэдэгдээд байгаа.

VR болон AR төхөөрөмжүүд нь таныг бодит ертөнцөөс холдуулж виртуал ертөнц рүү аваачихыг зорьдог бол Apple компани энэ хоёрын төгс балансыг олсон нь уг технологийг онцгой болгож буй юм. 

Бид компьютероо хулганаар, утсаа хуруугаараа удирддаг бол Vision Pro-г ашиглахын тулд та өөрөө л байхад хангалттай. Та ердөө өөрийн нүд, дуу хоолой, гарын хөдөлгөөнөөр удирдах боломжтой уг төхөөрөмж бидний хоорондоо харилцдаг арга хэлбэрийг цоо шинэ түвшинд аваачих нь гарцаагүй. 

Хэрэв та VR төхөөрөмж ашиглаж үзсэн бол хүнд, том зүйл толгойдоо удаан зүүснээс үүдэх ядралт болон дотор муухайралтын талаар мэдэх байх. Apple Vision Pro харин эдгээр асуудлуудаас сэргийлэн хэрэглэж буй хүндээ маш хөнгөн, тухтай байхаар бүтээжээ. Мөн ‘EyeSight’ технологийн тусламжтай та Vision Pro-г зүүсэн хэвээр эргэн тойрныхоо хүмүүстэй харилцан яриа өрнүүлэх ч боломжтой байх юм. 

Хүн хоорондын бодит харилцааг хадгалахын тулд зүүж буй хүний нүд дэлгэц дээр харагдаж байхаар бүтээжээ.

Vision Pro-ийн нэг давуу тал нь та уг төхөөрөмж дээр зураг, видео зэргийг үзэхдээ тухайн агшинд дахин очсон мэт бодит мэдрэмжийг мэдрэх боломжтой юм. Түүнчлэн Vision Pro нь Apple-ийн анхны 3D камер учраас та зураг, видеогоо 3D хэлбэрээр авч хадгалах боломжтой. Хамгийн күүл нь та хэн нэгэнтэй videocall эсвэл facetime-аар ярьж байгаа тохиолдолд яг л хамт суугаад ярилцаж буй мэт байх нь!  

4K нягтрал, 23 пиксел бүхий өндөр нарийвчлалтай дэлгэцүүд нь ямар ч орон зайг 30 метр бүхий өргөн хувийн кино театр болгон хувиргах чадалтай. Улмаар бид кино, нэвтрүүлэг зэргийг гаднаас нь үзэх биш дотор нь орсон мэтээр мэдрэх боломжтой болох нь ээ. Онгоцонд нисэж байхад эргэн тойрны чимээ шуугианаас өөрийгөө тусгаарлаж дуртай телевизийн шоугаа үзэж суухад ч их хэрэг болно байх. 

Диснейн гүйцэтгэх захирал Боб Игер уг төхөөрөмжид тусгайлан зориулсан шинэ туршлагуудыг бий болгоно гэдгийг дурдаад буй юм. Тодруулбал, Оддын Дайн сэдэвт виртуал кино театр, спортын тэмцээнүүдийн AR видеонууд, Marvel-ийн кинонуудыг бодитоор мэдрэх боломжуудыг хэрэглэгчдэдээ олгохоор ажиллана гэдгээ мэдэгдсэн байна. Хайртай дүрүүдээ хажууд нь байгаа мэтээр үзнэ гэхээр бас л янзтай мэдрэмж биз? 

Таны өдөр тутамд ашигладаг апп-ууд яг урд тань харагдаж байх нь. Тиймээс өөрийн хүссэн хэлбэрээр ажлын ширээгээ тохижуулж, апп хооронд нүдээрээ шилжиж удирдах боломжийг Vision Pro олгох юм. 

Гэхдээ өдөржин утастайгаа сатаарч, бие биетэйгээ жинхэнэ харилцан яриа өрнүүлэхээ ч мартдаг бидний хувьд уг технологи зөв хөрөнгө оруулалт мөн болов уу? гэсэн асуулт олон хэрэглэгчдийн толгойд эргэлдэж байгаа байх. Гэхдээ мэдээж энэ нь хэрэглэгч бидний ухамсартай хэрэглээнээс шалтгаална. 

Үнийн хувьд, бусад VR/AR headset-үүдтэй харьцуулахад 3,499 доллар нь өндөр үнийн дүн билээ. Гэвч мэдээж өрсөлдөгч брэндүүд илүү хямд хувилбарыг хөгжүүлж худалдах нь ч гарцаагүй. Хэрэв та анх удаа VR/AR headset туршиж үзэх гэж байгаа бол бид танд дараах бүтээгдэхүүнийг санал болгож байна.